正生書院遷校鬧出軒然大波後，立法會多個政黨都叉隻腳落去，有啲搶閘去探訪，有啲搵埋工程師去睇環境，更有啲帶埋幾千張心意卡入去，佢哋好似八仙過海咁各顯神通，直頭當正生係熱門景點。不過，政黨熱心得滯，就搞到教育事務委員會好冇癮，連想籌備七月初去正生參觀嘅團都要告吹。
教育事務委員會上次開會後，議員聽到正生嘅環境咁惡劣，都話應該入去參觀吓，方便遲吓跟進。點知教育事務委員會嘅參觀團都未搞得成，各大政黨已搶佔高地，先有白鴿黨拉隊入芝麻灣實地考察，其後輪到《城市論壇》移師正生校園舉行，公文袋陳淑莊同富貴黨新星方國珊都有入去撐場兼爭取曝光，而富貴黨上周末仲喺銅鑼灣街頭搞心意卡簽名行動，翌日都搵人入芝麻灣表心意。
個個政黨都變咗正生熟客，令到立法會再搞正規探訪團變得毫無意義，所以教育事務委員會主席專登致函各委員，取消呢個參觀團。
其實正生遷校風波已擾攘一輪，近日因為梅窩居民言行漸激、高官相繼力撐，先炒熱件事，政黨食住上，都唔知話佢哋反應快定係反應慢好！