豬流感襲港，港府嘅控疫同緩疫政策五時花六時變，萬千學生就一時停課唔停課、病人一時隔離唔隔離，搞到亂晒龍。不過，你有你亂，食物及衞生局局長周一嶽尋日下晝卻喺辦公時間去理髮，仲呻自己做嘢做到冇時間食飯。梗係啦，佢嘅工作同私人時間就好似病毒變種咁大洗牌，溝到亂晒龍，即使佢出席立法會會議瞌眼瞓、辦公時間去髮型屋理髮，都唔出奇噃。
尋日下晝大約兩點鐘，周一鑊明目張膽咁現身銅鑼灣羅素街金朝陽中心，搭
直上三十二樓潮人豪華髮廊hm Private i Salon，揀咗個近窗口嘅位坐低。轉過頭，髮型師已包住佢個頭，頭頂放咗個熱風機，周一鑊就歎雜誌解悶。約兩個鐘後，佢離開呢間髮型屋，我哋問佢係咪成日幫襯呢間潮人髮廊，點知佢竟然話係私人嘢唔講喎！既然係私人嘢，咁又點解喺工作時間去呀？周一鑊就懶偉大咁話：「我根本冇時間，連午飯都未食！」
不過，佢呢頭話私人嘢，嗰頭又解釋自己每三個月去飛一次髮，個師傅已跟咗佢個頭十幾年，價錢收得好合理，落樓都唔使一千蚊。講開又講，佢幫襯嘅髮型屋同政制及內地事務局局長林瑞麟嗰隻百零蚊洗剪吹相比，真係蚊髀同牛髀。
佢三個月抽兩小時理一次髮都嗌冇時間，睇怕因為本港醫療系統喺佢管治下，事故不斷，近期最轟動就係東區醫院遺失嬰屍事件、發霉「別嘌醇」食死病人、明愛醫院對心臟病發病人見死不救、車禍重傷傷者送到醫院，又要家屬畀咗錢至救人等，咁多衰嘢要執手尾，佢似乎應該呻自己能力不濟至啱。