本文重點
立法會調查梁展文事件進行得如火如荼，新世界集團兩名高層卻先後幾次發律師信畀委員會要求暫緩聆訊，立會已表態無意暫緩，雙方僵持之下極有可能要喺法庭見。家吓雖然好多行業都吹淡風，但大狀卻當旺，立法會透過事務律師行搵大狀畀法律意見都冇人騷佢哋，梁展文事件嘅專責委員會主席李鳳英同副主席李永達認真無奈。
新世界搵施偉賢相助
據講，新世界畀咗幾封律師信立法會後，雙方已經招來招往，新世界方面更已有行動，搵咗前立法局主席施偉賢提供法律意見。唔講唔知，施偉賢係香港大律師名冊上排名第一嘅資深大律師，又好了解立法會運作，佢幫新世界提供法律意見，對立法會真係一個挑戰。何況新世界陣營仲話，如果委員會堅持傳召鄭家純同梁志堅作供，就會提出司法覆核挑戰立法會。
立法會方面早前決定無意暫緩聆訊後，只係延遲咗今個月二十三號及二十五號嘅聆訊，下月中前都會畀時間新世界再研究其提出的法律理據。當然，立法會都唔可以怠慢，梁展文事件嘅專責委員會已經喺內部成立咗個四人法律小組，同時透過事務律師想搵大狀畀意見兼為將來可能要打官司做準備，可惜反應好麻麻。
據講原因之一係龔如心爭產案與訟雙方都有財有勢，扯咗好多城中大狀，冇人得閒接立法會呢單細官司；二係暑假殺到，有啲大狀要抖暑或返家鄉；三係立法會議員中有多名大狀，佢哋因為身份同利益衝突關係唔接得案，唔方便自己代表番自己，所以委員會到家吓都未搵到人。