銀紙抄詩句「鍾意就寫啦」

陳振聰昨在庭上講述其父的風水書《天圖佈局》，指該書只談及基本風水佈局，不涉及燒衣紙或祭品，亦無要求燒真銀紙，「本書冇要求燒任何嘢」，華懋一方資深大律師駱應淦遂質疑，為何當年會要求客人梁錦濠燒真銀紙，「你憑咩畀意見？」

陳解釋，因為「梁錦濠話想燒一啲嘢去拜祭」，而且他過往不時與父親討論哲學，當時陳父有一番解釋，「啲人要花費好多錢燒祭品，好傻，又唔肯定係咪真，唔肯定係咪第二個世界有用，燒咁多嘢好麻煩好奇怪，買一百蚊嘅衣紙點解唔燒真嘅一百蚊紙」。

陳振聰又稱，其父當時還說笑：「如果第日過咗身，要燒一百蚊嘅金銀衣紙，燒一百蚊真銀紙，我嘅靈魂都知呢張係真㗎啦。」 陳又稱：「我媽媽鍾意拜神燒衣紙，燒得好麻煩，所以我覺得爸爸嘅理論好好，同樣都係燒咗一百蚊嘅嘢。」駱應淦當庭質疑陳振聰「咁你講燒銀紙，唔係基於經書、古代典籍，純粹係父親嘅意見，係你父親開嘅玩笑？」陳答稱：「可能（係開玩笑），我哋傾偈都覺得有道理。」

陳承認，在真銀紙上抄上詩句、每日運程及謎語，並無任何經書或典籍支持，但當年是梁要求在真銀紙上「寫啲嘢上去」。他當時回應：「好，鍾意就寫啦！」駱應淦質疑有關說法，指梁錦濠當時面對刑事訴訟，有坐牢之虞，並支付巨額款項予陳振聰做法事化解擋災，怎會自己要求在真銀紙上寫上字句？陳解釋：「因為我當時已同佢做咗天圖佈局，我本書可以做嘅已經做咗，我對呢樣嘢冇專業常識。」