呢嗱，西九文化區管理局負責項目推展嘅行政總監程少泉，返咗七日工之後突然因為「個人理由」辭職。佢獲委任只有兩個禮拜，嗰張大班櫈未坐熱就話劈炮唔撈，西九項目都算多災多難咯。

呢單嘢真相到底係點？據講，佢之所以話走就走，其中一個原因係「做開私人公司，不慣在公營機構被綁手綁腳」。講白啲，咪即係頂唔順公營機構入面啲官僚作風，睇唔慣班官老爺淨係識吹水唔做嘢囉。

查實，程少泉做過跨國金融機構、知名地產公司同埋港鐵嘅管理層，又喺香港同歐洲迪士尼出任過高職，人才難得。佢減人工都肯入西九管理局做，就算唔係「屈就」，都叫做抵得諗吖。所以話，佢今次突然劈炮，背後梗有原因嘅。

講開又講，西九管理局成立大半年，一直依附民政事務局，大部分職員都由政府各部門借調，內部權責不清，唔知邊個話得事。想話做啲實際嘢，但決策權又唔喺自己手上，係人都心淡啦。

睇見班喺官場打滾多年嘅政務官，淨係識推卸責任扯貓尾，嘢就冇人去做，咁落去，多多時間都唔夠嘥啦。本來一心一意想為社會做貢獻，但發現自己好似跌咗落個官僚大醬缸咁，乜都做唔成，不如早走早着啦。

「我本將心向明月，奈何明月照溝渠」，連唔計較個人得失、一條心想幫香港做啲嘢嘅人都冇辦法做落去，政府部門同公營機構嘅官僚作風如果唔改變，有乜可能請到好嘅人才？就算請到，又點留得住？咁搞法，西九文化區又點可能成功吖？

叮！西九項目由開始構思到依家已經超過十年，幾時順過？幾時唔係搞到滿城風雨㗎？政府當初「忽然文藝」扮高雅，整出個假大空嘅西九文化區規劃，仲建議使幾十億搞個超大型「天幕」添。本來已經畫好晒圖準備招標，結果因為各方面利益擺唔平，要推倒重來。

叮！西九計劃話就話推倒重來，但唔知究竟幾時至可以重來。直到依家，政府仲係紙上談兵，幅地丟空咁多年，除咗繼續吹水，仲做過啲乜？身兼西九文化區管理局董事局主席嘅政務司司長唐英年，除咗嚟嚟去去三幅被齋噏之外，又有乜「大計」加快落實計劃吖？

正所謂，冇咁大個頭就唔好戴咁大頂帽，政府冇料就唔好學人玩文化藝術。睇嚟西九文化區都係拖得就拖嘅嘞，既然政府成日呻窮，幅地丟空咁耐簡直浪費，呢幾年地價又係咁飆，不如索性攞嚟發展地產，庫房閒閒地進帳幾百億，用嚟接濟吓低下階層又好，幫吓藝術團體又好，總好過繼續養草漚蚊，叮！