食物及衞生局近排搞乜衰乜，抗疫不力，嗌停課急且亂，車禍垂危人士入院又要先收藥錢至搶救，民間對周一鑊嘅怨氣真係無處宣洩，立法會議員「大舊」陳偉業尋日忍唔住當面向煲呔曾大數周一鑊，指摘佢搞乜都一鑊粥，施政好有問題。
尋日立法會議員同高官一齊食飯，司局長、行會成員都有出席，大家抽籤分席而坐，大舊同煲呔曾坐埋一席，趁機喺席上大打小報告，批評施政一塌糊塗嘅周一鑊漠視民意，搞到市民怒不可遏。高官議員飯局變成投訴問責高官嘅場所，周一鑊認真冇面，好彩佢坐喺另一席，否則真係食好嘢都背脊骨落咯。
其實，尋日煲呔曾嘅表現都好無厘頭，席上講到有大型財務公司搵收數佬淋紅油追債時，騷擾埋無辜嘅推薦人，煲呔曾竟然搭嘴話：「咁下次叫佢哋（債仔）喺推薦人一欄上寫上禮賓府啦！」煲呔曾真係噏得就噏！