豬流感疫情升溫，「怪醫」梁家騮早幾日感冒，發燒又流鼻水，但堅持唔睇醫生，尋日立法會同高官以及行政會議成員午宴，怪醫都有出席，佢已經冇戴口罩，仲試過近距離同發展局局長林鄭月娥咬耳仔添，咪話唔得人驚。
密斟私院用地選址
有人問怪醫：「行到咁埋，唔驚傳染畀林鄭呀？」怪醫就話自己好番晒，冇咳冇鼻水。佢早兩日堅持唔睇醫生，尋日又再好得戚咁話：「我望住塊鏡睇自己咪得囉，飲多啲水就自然好番啦！」
講番佢同林鄭密斟，原來係關注早前發展局建議嘅四幅私家醫院用地選址問題，佢話黃竹坑、將軍澳同大埔三個選址比較遠，睇吓仲有冇得斟酌其他地方，當然林鄭亦有回應啦。