本文重點
基層形象深入民心嘅工聯會全力開拓中產、專業之路，繼早前為會計界成立工會後，尋日保險業總工會舉行新一屆理事就職禮，工聯會就搵嚟一班保險界翹楚撐場，新理事長吳秋北仲為新一屆理事擔任監誓人。
吳秋北四出派片
保監專員張雲正、從事保險業嘅前行會成員陳智思尋日都有出席典禮，新上任理事長嘅吳秋北尋日主動四出派片，仲為新理事監誓，唔知係咪自己都係新丁，佢帶領宣誓時顯得戰戰兢兢，事後問番佢係咪怕醜怯場，佢笑住擰頭話：「緊張？我冇呀！我驚讀錯名之嘛！」佢又話，今次唔係首次監誓，唔會「騰雞」喎。
講開吳秋北，原來佢已經係三個仔女嘅爹哋，仔女分別讀緊幼稚園同小學，近日小學停課，佢都要幫手湊仔，嚟緊暑假仲打算帶仔女出門旅行，可惜周圍都係豬流感嘅火頭，齋諗地點已經令佢好頭痕！