活出超越夢想嘅人生

本身為汕頭大學校董會主席嘅超人，尋日向台下汕大畢業生道賀之餘，更為即將投身社會嘅同學仔打氣。超人喺演說中話，對汕大嘅畢業生有信心，儘管世道無常、矛盾錯雜，遊戲規則亦每每有唔公平同唔公正，但佢相信汕大人仍會堅持以原則同價值觀走喺康莊大道上。超人寄語汕大人要「建立自我，讓個人夢想成真，追求無我，令更大嘅理想成真」，勉勵大家要活出超越夢想嘅人生！

超人仲憶述話，記得三十年前，現時汕大嘅位置係一片稻田，尋日見到汕大畢業生嘅燦爛笑容同自信臉孔，就知道當年支持興建汕大嘅決定係正確嘅。超人呢句說話咁窩心，相信對汕大畢業生嚟講，已經係最好嘅鼓勵。