尋日立法會宴請政府高層，正生事件再次成為焦點，事關教協會長兼白鴿仔張文光喺席上向煲呔曾遞上逾半數立法會議員聯署支持正生遷入梅窩嘅信，而白鴿黨三個議員鐵頭仁、高達加埋涂謹申亦喺晏晝踩入芝蔴灣探望正生學員，當正係正生代言人咁。

不過，富貴黨都不甘示弱，今日會喺街頭發起心意卡簽署行動，要求市民簽支持正生嘅心意卡，藉此搶佔正生呢個戰場。佢哋兩黨先後出招，令建仔同公文袋處於下風，側聞佢哋都有所行動，或者嚟緊嘅禮拜三立法會休會辯論，先係佢哋出招爭風頭嘅時候。

鄉議局靜雞雞變陣

政黨撐正生爭到頭崩額裂時，鄉議局卻靜雞雞變陣，副主席張學明尋日就將矛頭直指政府，尤其唔明白點解「梅窩係唯一選擇呢？」佢話，整個過程中，政府由始至終都畀唔到鄉議局信服嘅理由，而輿論一面倒批評梅窩居民，營造正生書院贏晒、居民輸晒嘅情況，對居民好唔公平。所以鄉議局今日會向政府建議四個空置校舍選址，包括葵涌村校方案，畀正生書院多幾個選擇。

好笑嘅係，政黨、團體你爭我搶，官員就個個鬥縮頭，連日嚟律政司司長黃仁龍、保安局局長李少光，甚至教育局局長孫明揚都隱晒形，真係唔知佢哋葫蘆入面賣乜嘢藥！