自旺角日前發生奪命車禍之後,又再勾番起好多香港人嘅集體恐怖回憶,好多小巴司機為咗搵多兩轉,有咁快飛咁快,見住個車速顯示器嘅數目字「50……60……70……80……90……」係咁升,坐喺裏面,真係心都寒埋。
幾年前,運輸署見涉及亡命小巴嘅意外傷亡多過乜,終於整咗個車速顯示器出嚟,話就話用嚟畀乘客監察公共小巴,防止司機超速駕駛,而乘客可以根據呢個數字,投訴司機嘅違規行為。不過除咗運輸署署長黃志光唔知之外,睇怕係人都知呢個車速顯示器係得啖笑。
本報記者日前喺日間搭由落馬洲去天水圍嘅專線小巴,當小巴駛到去新田公路時,時速已經超過八十公里,顯示器閃晒燈,但係當時速最高去到一百一十三公里時,車速顯示器居然冇響,司機亦冇減速。
同日夜晚,記者再搭同一條路線嘅小巴,上車唔夠兩分鐘,車速已經踩到去八十公里,顯示器已經嘟嘟聲,直到車速去到一百一十五公里時,小巴司機繼續飛車。喺同一路線、交通情況差唔多嘅情況下,日間車程要三十二分鐘,夜晚只要二十六分鐘,快咗六分鐘咁多,快到得人驚。
鬼咩,原來車主及司機都冇法律責任確保顯示器運作正常,所以好多車速顯示器都會無端白事「失靈」。有業內人士透露,由於車速顯示器供應商競爭激烈,好多都幫顧客將顯示器嘅嘟嘟聲校到蚊螆咁細聲,又或者去到一百公里時至響,車速顯示器長期被人干擾,運輸署統統唔理。
除咗車速顯示器冇人理,好多司機嘅駕駛態度都好有問題,超速以及危險切線幾乎係家常便飯。記者喺深夜乘搭一條落馬洲至屯門碼頭專線小巴,司機夠膽死公然超載,叫一個男乘客用報紙墊地坐喺梯級上。而另一條觀塘往落馬洲嘅小巴仲牙煙,司機一邊叼住口煙,一邊同行家傾無線電,認真無品。
查實運輸署○三年開始研究喺小巴上安裝俗稱黑盒嘅行車監察系統,用嚟紀錄低行車過程嘅所有資料,萬一有意外發生,睇吓個黑盒就知衰邊瓣,一定比車速顯示器更具阻嚇力啦。
點知呢個黑盒計劃拖延四年幾後又突然叫停,叮,裝個黑盒有幾難啫?係咪當局唔見棺材唔流眼淚,再死多啲人至知驚呢?
叮佢個鎯鎯,小市民搭親小巴都好似搵命博咁,靠政府不如靠自己,上車綁好安全帶,除咗求神拜佛保佑冇事之外,睇嚟都冇乜嘢可以做咯!