正生書院風波鬧到火紅火綠，新界鄉議局主席劉皇發夾喺政府同鄉民中間左右做人難。咁啱得咁蹺，發叔同鄉議局副主席張學明尋日中午前後腳入去香港會，十分鐘後就見到教育局局長孫明揚單拖趕到，據聞三人會面傾足粒幾鐘至走人。
喺門口捉住發叔，佢笑住承認孫公請食飯，但就話餐飯約咗好耐，佢同孫公敍吓舊啫。咁係咪傾正生書院風波先？發叔唔肯講，話佢本住四字真言處理正生事件，就係「事緩則圓」，即係唔急得，慢慢嚟自然搵到解決方法。發叔離開後，輪到孫公。問佢度到橋解決正生書院事件未？佢好無奈咁話：「仲諗緊！」又唔認同發叔食飯添！咁都得？話個劉孫飯局冇景轟實冇人信啦！