政府尋日宣布公務員調薪、問責官員減薪後，行政會議非官守議員召集人CY梁振英亦宣布，十四位行會非官守議員亦跟隨減薪百分之五點三八。
佢之後解釋，非官守議員嗰份唔係叫做「薪酬」，應該叫「酬金」至啱，事關佢哋做行會嘅唔似得立法會議員咁，有實報實銷津貼用嚟開辦事處同請人。佢仲以自己為例，請咗三個政務助理，佢哋嘅人工加埋仲多過佢份糧，再者佢又要交稅，平時又要宴請吓啲外國領事，總之就同政府官員或立法會議員唔同啦！
雖然CY冇宣之於口，但唔夠錢使嘅意味甚濃！不過，被問到點睇財爺鬍鬚曾公開話過減人工幫助唔大時，CY竟然話聽唔到喎。