新制服分冬、夏款色，前線員工着Polo恤，主管級則穿恤衫，全部以淺綠做底色，配以橙黃迷彩圖案，而最貼心嘅係前線員工件Polo恤有條高領，加埋條拉鏈，布料透氣透汗兼會驅蚊，再隨身攜帶小風褸，完全體會到員工隨時「通山跑」，一時大汗疊細汗，一時又要遮風擋雨嘅需要。

阿Paul揀咗件前線員工嘅衫嚟試，佢左擰右擰（圖），驚住着得唔靚，之後大讚件衫好輕好似冇着咁，又話最欣賞件風褸，係旅行隨身裝備，仲講笑咁講如果喺立法會都可以着就好嘞！「三碌拎」知道後好識做，話會送件畀議員，但到時唔知阿Paul係咪真係着呢？