尋日喺中環有個建國六十周年大型展覽，唔少政商界人士嚟撐場，而喺主人家致辭後，就輪到政制及內地事務局局長「林公公」林瑞麟，佢篇致辭有幾頁紙厚，由四九年新中國誕生講起，都未講到改革開放推進「四化」，大概講咗五分鐘度，身為主禮嘉賓嘅煲呔曾竟然急住去搵周公傾偈。
見煲呔曾對眼皮不停垂吓、開吓，當林公公講到中華振興、香港點樣從CEPA搵機遇時，煲呔曾直頭進入深層睡眠狀態，不停釣魚，整個「垂釣」過程足足維持四、五分鐘，旁若無人，簡直失禮死人。
煲呔曾最近忙住搞抗疫，尋朝行政會議又討論問責團隊減薪，究竟佢係因為攰得滯瞓着吖，定係被人稱「人肉MP3」嘅林公公催眠，真係要問佢自己至知。
