立法會飲食界代表「肥仔張」張宇人同漁農界嘅「肥根」黃容根，以及幾位九東直選議員邀請政府代表去鯉魚門視察，想用民眾壓力逼政府收回成命，點知食物及衞生局副局長梁卓偉帶埋政治助理陳智遠、旅遊事務專員方舜文，仲有十幾個當局官員一齊「出巡」，肥仔張即刻話：「嘩！政府晒馬喎！」

巡視期間，主要由九龍東議員「肥仔明」李華明同梁卓偉過招。根據法例，鯉魚門近岸過咗燈塔就唔屬於維港範圍，但咁啱商戶抽水嘅地點喺範圍以內，肥仔明話維港定義有闊有窄，政府應該彈性詮釋，梁卓偉即時反唇相譏：「法例對維港有清晰定義，不過你哋係立法會議員，你哋有權修改。」

梁卓偉仲反客為主，向商戶提出三個建議，包括要改用科學鹽水養魚、買水同商戶夾錢喺燈塔外起抽水系統等，隨即畀肥仔明當場擊破，話鯉魚門養嘅都係貴價海鮮，改用科學鹽一旦技術掌握得唔好，好易搞到魚類大量死亡，而買水嘅運送過程麻煩，建抽水系統嘅經費亦非商戶負擔得起。

商戶執笠改賣鹹魚？

肥仔張亦加多句：「咁搞法，商戶實執得七七八八，到時可能要改賣鹹魚！」肥仔明講到明希望政府妥協，肥根仲話如果梁卓偉唔應承，就將佢掟落海！

口硬又點吖，班議員嚟招鯉魚擺尾，咪一樣掃咗梁卓偉落海，若果佢仍然要同議員硬碰嘅話，睇怕都冇乜好下場。