金融海嘯殺到埋身，近二十萬人冇工開，但公務員捧住個鐵飯碗，薪高糧準，高官更加閒閒地幾十萬一個月，日日行行企企，叫小市民條氣點順吖？既然商務及經濟發展局局長劉吳惠蘭可以叫市民減薪一半同老闆共度時艱，咁公務員減人工同小市民共度時艱，都唔係太過分啫。

點知有公務員團體一聽到個「減」字即刻起晒槓，想佢收少個崩都嗌到拆天咁！呢嗱，上個月公布嘅薪酬趨勢調查結果顯示，低、中、高層公務員今年應分別減薪百分之零點九六至百分之五點三八。但係薪酬趨勢調查委員會日前竟然好罕有咁唔係一致確認調查結果。

其中投反對票嘅警察評議會職方代表話，有兩間被納入調查範圍嘅公司出現薪酬政策轉變，導致不合理及不公平嘅結果。剔除呢啲因素後，中、低層公務員嘅薪酬趨勢指標會由負變正，高層嘅指標更會大幅減少逾三個百分點。

對於有公務員團體唔肯確認薪酬趨勢調查結果，據「東方報業民意調查」顯示，三成三受訪者批評係輸打贏要，想推翻減薪結果；另外有兩成四認為係搵藉口唔想減薪；又認為如果有問題就應該老早反映，唔好等公布之後至提出。

其實，早喺薪酬趨勢調查結果公布之前，有公務員團體已先下手為強嗌定凍薪先。好嘞，公布之後知道理虧，又輸打贏要唔肯確認減薪；華員會仲諸多藉口，話今次以少數服從多數方式確認報告，一改全體委員要一致通過嘅慣例，質疑委員會將技術問題政治化，威脅要研究下一步行動添，根本就係打橫嚟講！

叮佢個鎯鎯，咁嘅時勢仲邊度再有花紅、獎金呢支歌仔唱吖，裁員減薪、放無薪假就要幾多有幾多。最弊係班公務員身在福中不知福，點知道基層市民生活喺水深火熱之中吖？

所以調查亦顯示，三成五受訪者唔接受反對團體嘅理由，認為納入調查嘅公司即使改變發放薪酬及花紅準則，亦唔應該剔除，因為公司改變係反映咗經濟實況；三成二表示改變準則係常見嘅市場行為，能夠反映薪酬趨勢調整；一成四就話納入調查範圍係公平合理。而有五成二受訪者認為當局應該按照薪酬趨勢調查結果減薪；建議可凍薪嘅只有一成九；認同根據剔除兩間問題公司後嘅調薪幅度只係得一成五。

正所謂唔好大教壞細，又唔怪得有公務員團體起晒槓，嗰班問責高官話要減薪夠係廢噏咯，減條毛就有！一直只聞樓梯響。有關注團體一嘢踢爆，港府高層唔肯落實減薪，咪就係想呃得一個月多一個月囉。

對於問責高官減薪仍然得個講字，有四成一受訪者促請高官應該盡快帶頭減薪；三成五直斥官員同市民共度時艱係「得個講字」；一成五擔心高官想肥上瘦下。

公務員事務局局長俞宗怡你聽到小市民聲音未呀？唔好再係得個講字，唔該快啲拆掂佢。如果公務員繼續唔理民意打死都唔減薪，唔單止將政府所餘無幾嘅威信打殘埋，民怨爆起上嚟，唔係講玩(口架)！