新地老大郭炳湘舊年由主席轉為非執董後謝絕應酬，對上一次現身，係同郭老太喺倫敦結伴欣賞芭蕾舞，低調到極。近日郭大少終於靜極思動，上禮拜以世界華商聯合促進會重慶高層考察團團長身份，拉埋三十幾個政商名流去重慶覓商機。
郭大少全程笑容滿面咁穿梭賓客之間寒暄，表現投入，相比早前發生兄弟爭拗時愁眉不展、心事重重嘅樣，明顯心情靚番晒。結束三日重慶之行後，佢順便去埋上海考察，包括參觀當年佢以新地主席身份拍板、喺浦東陸家嘴興建嘅國金大廈，今日仲會去北京開會添！
對上海有乜評價呀？佢大讚上海有晒條件做國際金融中心，好快爬過香港頭都未定。唔通佢發現內地天大地大，不如轉移陣地打拚內地江山？
