民協嘅立法會社福界代表張國柱（圖）係論壇主講嘉賓之一，佢話嚟得就預咗有危險，一早諗定如果真係咁唔好彩「中彈」，就即時瞇埋對眼，因為手手腳腳整親，可能沖沖水就冇乜事，但靈魂之窗咁脆弱，鏹水入眼真係唔講得笑。

論壇搞手、立法會議員馮檢基話申請使用呢個場地時，啱啱發生第二單鏹水彈「炸人」事件，但呢個論壇係七一連串活動之一，加上佢個人好阿Q咁認為活動「夠正氣」，相信狂徒唔會亂嚟，所以決定如期舉行。而民協主席廖成利就喺發言時專登對住個天講：「呢度有天眼，唔好掟我呀！」場面搞笑。