但維港嘅範圍包括海鮮檔林立嘅鯉魚門，檔主群起反對新例，當區九龍東幾個立法會議員、飲食界同漁農界代表當堂義不容辭，爭相為「米飯班主」解決問題。估唔到一條附屬法例，可以令各左、右政黨走埋一齊，今日仲柴娃娃入鯉魚門睇食肆嘅抽水操作添！

小組委員會主席張宇人嘗試從中斡旋，睇吓各黨可唔可以達成共識，迫使政府讓步，將維港條界劃歪少少，又或者容許業界將抽水條喉離沿岸遠啲。佢仲話鯉魚門食肆幾十年嚟都係咁樣攞水養魚，要佢哋改變，營運成本大增，希望政府「畀條生路業界行吓」。

建仔、工聯會同富貴黨話晒都係親建制派，只要政府唔過分、民意反彈唔大，平時政府提交附屬法案，佢哋一般都順攤收貨，而當區白鴿黨嘅議員李華明亦同食衞局官員有偈傾，但選票大過天，呢次政府面對呢班「抽水議員」都相當頭痕。