肥亨呢排四出傳道，尋日又去咗主日崇拜做見證。眾所周知，佢講嘢不嬲都好搞笑，一上台就講到最近嗰套膾炙人口嘅電視劇，跟住直情柴九上身，爆句「人生有幾多個十年？」仲話呢句說話真係好有意思㗎！

變身政壇柴九嘅肥亨跟住大談金融海嘯下點樣理財，觀眾以為有炒股貼士醒，原來佢口中所講嘅財富，唔係現兜兜嘅「茄薯」（Cash），而係健康、親情同心靈投資。

啪多咗安眠藥變懵仔

講到健康，話題自然就扯到青少年濫藥問題。佢話見到時下青少年濫藥同打劫覺得好痛心，仲自爆「啪丸」瘀事。話說佢有次搭十幾個鐘長途機，因為怕時差瞓唔着，於是事前叫醫生開咗啲安眠藥，但啪咗一粒都瞓唔着，跟住又啪多粒啦，點知瞓到幾乎不省人事，要勞煩空姐大力拍醒佢，落機後仍然好似夢遊咁款，可想而知「啪丸」幾咁傷身喎。

自爆瘀事，政壇柴九無非係想話畀啲青少年聽，啪安眠藥多咗都會變懵仔，隨便濫藥、索Ｋ真係食壞腦㗎，正所謂「你玩藥，藥玩你」，提醒啲青少年千祈咪試，試問吓佢哋嘅人生又有幾多個十年吖？白白浪費青春、健康同前途就唔抵啦！

佢仲舊事重提，話年前得知有腦血管病後，心情曾忐忑不安，唔知係咪應該引退，得到神嘅啟示後，佢就遞信辭職。估唔到離開官場冇耐，金融海嘯殺到，唔少財金高官畀人炳到體無完膚，佢話望返轉頭，辭官確係一個明智決定，如果自己仲在位嘅話，可能已經被問責下台喎。