旺角鬧市前晚又發生嚴重車禍,一架專線小巴由西洋菜南街轉出旺角道嗰陣,與埋緊站嘅巴士相撞,跟手剷上行人路衝咗六十米,撞向途人同等緊巴士嘅市民,造成兩死八傷。小巴司機涉嫌危險駕駛被警方拘捕。
雖然事故原因仲調查緊,但全城最熱鬧嘅旺角發生咁嚴重嘅慘劇,香港仲點好意思叫自己做「安全城市」吖?有的士小巴權益關注組織負責人話,出事地點路段設計欠佳,彎位又窄,司機經常因為互相搶線出事。亦有市民話,現場路面太窄,一旦車輛失控,途人避無可避,最好遷移巴士站。
無論原因係乜,現場由朝到晚人來人往,巴士、小巴同其他車輛喺咁窄嘅彎位爭路,行人路又有咁多人等車,隨時爆大鑊。咁明顯嘅安全隱患,到底係睇唔到定係睇到詐唔知?唔該運輸署同警方向市民交代清楚。
叮!政府對呢類交通安全陷阱,一向隻眼開隻眼閉,唔畀人踢爆都唔會做嘢㗎啦。嗱,油塘茶果嶺道經常有人違例泊車,居民焗住要「攝車罅」出入,險象環生,一年半內先後發生多宗奪命車禍。但警方一直懶理,直到今年三月有休班警員撞「死車」喪命,至加強執法捉違例泊車。
前晚旺角大車禍發生後,死者家屬希望警方徹查慘劇係咪涉及人為因素。其實,係人都知,亡命小巴一直係本港交通安全嘅「歷史問題」。據運輸署統計,○五年至○七年,涉及小巴嘅交通意外平均每年有一千一百宗,其中唔少都造成傷亡。單係○六年,就有十八名市民成為小巴輪下冤魂。
「小巴亡命飛,乘客心驚驚」嘅恐怖劇幾乎日日發生,尤其係通宵小巴,好多坐過嘅市民都唔敢再搵條命博。「奪命飛車」通街飆,但警方冇加強執法打擊危險駕駛不特止,亦冇加強對駕車人士、尤其係職業司機駕駛態度嘅教育,更加冇檢討現有考牌制度喺呢方面有乜嘢要改善。
路面愈來愈危險,行人愈來愈唔安全,但係當局對違例者嘅處罰就一樣咁寬鬆。舊年六月,一位八十七歲嘅婆婆喺九龍城畀貨車撞死,涉案司機原來唔止無牌駕駛,仲用埋「光頭胎」添。肇事者被控包括危險駕駛導致他人死亡、無牌駕駛等罪名,但法庭居然裁定危駕致他人死亡罪不成立,最終只係罰咗佢八千蚊咁大把,死者家屬唔忿,前日開記者會大控訴。
叮!七百萬人口嘅大都市,有交通意外唔奇,奇就奇在政府既唔管又唔理,執法求求其其,懲罰毫無阻嚇作用。無牌駕駛撞死人,只係輕判罰款幾千蚊了事。真係唔知呢啲到底係懲罰定係「獎勵」。
全港今年頭四個月交通意外傷亡總數超過五千二百人。政府搞咁多安全駕駛運動,但係意外一單接一單,一鑊勁過一鑊,搞鬼搞馬咩,自己搞清楚乜嘢叫交通安全先啦!