離開醫管局之後，高永文醫生投入好多公共服務，好似尋日嘅「傑出義職人士揭幕禮及分享會」，佢應邀以香港紅十字會醫護總監身份出席，即場介紹紅十字會喺四川德陽市一間康復及假肢中心嘅醫療工作，仲透露曾經帶一對囝囝去內地助學長征同支援四川添，令囝囝都改變咗。
高醫生話，見到四川災情嚴重，可謂天崩地裂，唔少災民唔係冇咗對手，就係冇咗對腳，換着自己都未必承受得到，但佢見災民依然好樂觀面對，令佢既感慨又佩服。佢仲話，紅十字會一班義工承諾喺未來三至五年，平均一個月上一次四川幫手，佢當然唔例外啦。
佢又透露屋企人見佢做義工咁辛苦，都想佢做少啲，但佢反而帶埋家人一齊去做，所以之前去助學長征定係其後去四川支援，佢都帶埋一對囝囝去，令佢哋感受好深，返嚟都唔同咗。