本文重點
立法會大會日前出現界刀客自插事件，令議會出現第一滴血。事件中，旅遊界嘅謝偉俊（Paul）被譽為最勇議員，衞生服務界代表李國麟亦被譽為最佳傷口包紮員，醫學界代表「怪醫」梁家騮當日郁都唔郁吓，畀人質疑佢縮埋一邊。怪醫解釋，佢當時只係靜觀其變，冷靜處事啫。
欣賞阿Paul夠英勇
佢話，一開始已留意到件事，但見到咁多人圍住事主，而事主睇落仲好清醒，冇必要作進一步醫學救援，所以先冇圍上去。佢仲話，當時事主需要嘅藥唔係食落肚嗰啲，而係要議員聽佢申訴，就係咁，決定靜靜哋坐喺議員席上，默默觀察事件，皆因冷靜亦係應變嘅方法。
呢個解釋真係有啲牽強，算唔算跌落地
渣沙？不過，怪醫就好欣賞第一個衝上前應變嘅阿Paul，話佢夠英勇，唔慌張咁上去接事主嘅申訴書，令事主情緒迅速平復落嚟。得到同事讚賞，阿Paul都好禮尚往來，幫口話怪醫係外科醫生，見慣大場面，當日嘅自插事件只係小意思，唔使怪醫出手喎。