從富貴黨分裂出去嘅3L好快自立門戶叫做「經濟動力」，三名成員林健鋒、梁劉柔芬同埋梁君彥後日（十六號）更會搞個酒會慶祝添！富貴黨副主席方剛話，佢仲未收到經濟動力嘅請帖，但對方如果派帖，佢一定捧場！立法會工業界代表林大輝都話有請必到。
方剛同林大輝日前喺立法會停車場出現，講起3L個新竇就快開張，方剛笑笑口咁一連講咗四個「好」字，仲話，話晒都係一場同事兼前黨友，請到佢一定去。
講開又講，方剛早排做召集人嘅齊抗金融海嘯大聯盟搞咗個父親節活動，嘉賓之一、自稱成世未買過六合彩嘅白鴿黨議員李華明，抽獎抽中張六合彩飛，估唔到肥仔明非常好運，張六合彩中咗三個字，有二十蚊獎金！