喺今屆香港電影金像獎頒獎禮中橫掃四個大獎嘅《天水圍的日與夜》，寫實咁講咗天水圍嘅問題，撼動好多香港人嘅心，智囊組織智經嘅一班成員尋日都專登包場睇呢套戲，獲智經推薦入政府嘅教育局副局長陳維安夫婦都有出席，導演許鞍華尋日仲話，自己都估唔到套戲嘅反應咁好。
醫管局主席兼智經研究中心主席胡定旭睇咗套戲三次，話好感動，特別搵老友許鞍華義助借出影片，喺中環IFC Palace包場放映同舉行分享會。許鞍華透露，開拍《天水圍的日與夜》只係一個意外，佢○四年見到天水圍社區嘅各種慘況，想拍齣戲為區內居民同香港人打吓氣。
但係搵投資者相當困難，曾經試過有投資者撻訂退出。許鞍華仲話，當初明知齣戲係冇市場，就連首影都冇去睇，但估唔到齣戲依家反應熱烈，所以有時正面劇目都會帶嚟意外驚喜嘅。