14/06/2009

播放本新聞相關短片

政情:黃至剛戴口罩畀人笑

香港人全面戒備豬流感(H1N1甲型流感),但好多疫情嚴重嘅國家卻唔當係一回事,城中兩個名人近排都去過疫情最嚴重嘅美國,好似馬會前行政總裁黃至剛咁,就因為防疫畀人笑到面黃。

黃至剛日前去咗美國芝加哥列席一個商務會議,為免感染豬流感,將病毒帶返香港,佢特別帶備咗幾個口罩以便喺坐飛機同開會時戴,點知一上到機就發現自己係全場唯一一人戴口罩,戴咗冇耐就自覺冇癮除咗。之後佢喺開會時戴口罩,情況亦同機上差唔多,期間仲有位外籍人士陰陰嘴笑咁對住佢扮咳,好似暗寸佢呢個亞洲人對豬流感過分緊張,搞到佢面都黃埋,最後都係跟大隊不設防唔戴口罩。

前財爺梁錦松家吓係百仕通(Blackstone)大中華區主席,佢啱啱由美國夏威夷公幹返港,佢話喺美國所見,當地人只會喺人多密集嘅地方先至戴口罩,大家都覺得唔需要好似對抗沙士咁大陣仗。

直擊人類豬流感最新疫情
詳情瀏覽on.cc《奪命流感》