譚校長係資深嘅教育界代表，曾經擔任私立學校團體嘅主席，早前佢聲言全校千幾個學生，只有七個學生有濫藥嘅惡習並唔算多，引嚟唔少批評，有立法會議員直斥學生濫藥或吸毒一個都嫌太多，質疑譚校長故作輕鬆；亦有啲教育界人士私下表示，呢句說話好似暗示本港學生濫藥情況應該更嚴重咁。

尋日，譚校長喺電台發表家書，又講學生濫藥一事，佢話學生濫藥嘅罪魁禍首應該係過去十年香港社會嘅急劇轉變，佢由九八年金融風暴數起，二○○○年科網爆破、沙士加上舊年嘅金融海嘯，對香港帶嚟好大衝擊，問題多到連成年人都未必應付得到，何況係年幼嘅中學生呢？所以佢發現一啲啱啱升上中一、二嘅學生，喺物質豐裕嘅引誘下，好容易混淆價值觀念、誤入迷途，或以酗酒、賭博同濫藥自我麻醉。

再規劃天水圍變希望之都

講完社會大形勢後，佢嘅焦點又轉番天水圍，話天水圍係一個非常年輕嘅社區，青少年人口比例特大，若喺社區內增加運動同活動場所，或者可以減低青少年嘅犯罪問題，到時天水圍就可以變成「希望之都」。經譚校長錯縱複雜嘅分析後，結論係天水圍有學生濫藥，唔單止係社會嘅錯，連社區規劃失誤嘅錯都有，總之就係處處都有錯。咁講法，學校同教育界嘅錯係咪少好多呢？