尋日立法會開緊會，公眾席有個男人突然起身大嗌，先將一條橫額掟落議員席，跟手攞把刀出嚟割傷手腳，主席要宣布暫停會議。

上去了解情況嘅議員，一個做信差接過佢手上嘅公開信，另一個就做救護員幫佢止血。據講個男人話自己有精神病，求助無門，想喺立法會表達怨憤。擾攘咗五分鐘，個男人至被帶走，會議繼續進行。警方後來以涉嫌藐視立法會罪拉咗佢。

場面咁激認真少見，立法會話晒都係議政嘅嚴肅地方，喺公眾席高聲喧嘩都唔得啦，依家袋埋把刀入去居然冇人發現。好彩呢次掟落下面嘅係條橫額啫，如果係把刀，又咁啱插中某位議員個頭，整單「血濺議事堂」，仲唔即時做晒全球新聞頭條？

話時話，乜立法會大樓冇保安檢查嘅咩？有就有，之不過佢哋喺「有需要時」至檢查對方攜帶嘅小型物件。當局話，曾經諗過喺出入口加設金屬探測器，因為空間有限，「基於對公眾的信任」，最終冇咗件事。

叮！咁咪袋埋支黑星手槍入去都得？再講，議事堂隨時可能有名人、富商上嚟作供，保安措施有等於冇，容乜易搞出人命㗎？其實，立法會大樓前幾年就發生過有人以火酒淋身衝入去點火自焚事件，但保安情況到依家都冇改善。當局檢討保安措施再係咁拖，遲早會爆大鑊。

香港地依家周圍立立亂，真係冇晒安全感。喺鬧市行街，樓上隨時會飛支超勁鏹水落嚟，整劑「天女散花」，閒閒地「灼」到幾十人。至弊警方查嚟查去都拉唔到「鏹水狂徒」，連啱啱裝嘅「天眼」都變埋「白內障」。市民行路帶眼都未必安全，要頭殼頂生埋對眼至掂。

叮！治安呢家嘢，絕對唔能夠麻痹大意，一出錯就好大件事。好似旺角嘅三次鏹水彈事件咁，第一單舊年年底發生，區內安全已經響起警報。如果當局及時喺附近裝「天眼」，狂徒又點會咁沙膽，接二連三挑戰警方吖？點知有關當局拖咗幾個月都未裝「天眼」，咪搞到無辜市民畀人「灼完又嚟灼過」囉。

政府成日吹香港係「最安全城市」，英國「經濟學人訊息中心」早兩日公布嘅全球最佳生活城市調查結果，香港排第三十九位，部分原因係治安良好。如果排名遲少少公布，香港睇怕要跌幾十位。

呢幾年香港愈來愈唔安全，醉酒駕駛撞死人不過碎料咋，冧招牌砸死人、古樹倒塌壓死無辜女大學生、冇樹冇車嘅行人專用區變咗「空中鏹水狂徒游擊區」，連議員坐喺議事堂都心驚驚。乜鬼「安全之都」吖，危城一座就真。叮！