新一代「公職王」張震遠（Barry）近排曝光率激增，尋日佢出席美國商會午餐會時，竟帶埋阿仔上陣，Barry身材高大，估唔到阿仔更犀利，足足比爸爸高出半個頭，佢啱啱先喺美國返嚟香港過暑假，所以陪老竇出席吓午餐會學嘢。
Barry嘅囝囝今年十九歲，中文名叫張緒仁，依家喺美國加州Claremont McKenna College讀緊大學一年級，最近返咗嚟過暑假。呢間係美國著名嘅文理學院，為商界、公共行政及政治界出產咗唔少領袖。
其實，Barry尋日係有心畀阿仔曝光，事關佢喺午餐會講完嘢後，傳媒個個都追住佢問市建局、商交所嘅問題，佢一一回答後，忽然拍一拍身旁一位非常高大嘅後生仔心口話：「下次訪問吓佢吖！」唔通佢想培訓阿仔做「公職王」接班人？