暑假轉眼就到，新一屆立法會議員既迎來首個休會悠長假期，又可以參加公職外訪活動，實行以公費遨遊兼豪遊天下。今年暑假嘅外訪團暫時有兩個，分別去東歐同南韓、台灣，其中福利事務委員會轄下嘅滅貧小組去南韓台灣嘅七日團，平均開支估計為二萬同三萬大元；議會聯絡小組去東歐嗰個團暫時冇具體資料，估計開支高達五、六萬蚊。
根據立法會福利事務委員會嘅文件，南韓台灣團定於下個月十九至二十五號出發，考察當地嘅社會企業運作。秘書處初步計算嘅價格顯示，議員如果坐經濟客位，團費係二萬零四百蚊；但如果揀商務客位，團費就變成二萬九千七百蚊。令人不解嘅係，○七年九月，立法會滅貧小組先去過歐洲西班牙、英國等地考察社會企業，返咗嚟兩年，香港嘅社會企業並未見有長足發展，今轉佢哋又去南韓、台灣，到底有冇用㗎？
另一個暑假豪遊團係去東歐，呢個團係議會聯絡小組發起，想去新興嘅民主國家如捷克、匈牙利等交流議會運作，去南韓台灣都要成二萬幾蚊，去東歐嘅團費實貴一倍或以上啦！依家兩個團都未開始報名，但按過去嘅情況嚟睇，暑假豪遊例牌向隅，今次睇怕都唔例外。