基督教臻美黃乾亨小學暨初中學校嘅風波未平，外間一度盛傳前廉政專員羅范椒芬介紹該校校監梁淑貞畀有份捐錢辦學嘅黃英琦（Ada）認識，前晚我哋喺友好協進會晚宴撞到黃英豪（Kennedy），佢起初唔太願意講件事，強調當年佢哋五姐弟夾咗五百五十萬元辦學，除咗紀念父親黃乾亨七十歲大壽外，亦係一心行善，興學育才，未諗到搞出風波。
佢仲話，聽家姐講，梁淑貞的確係羅范介紹畀佢識嘅。不過，羅太日前先解釋唔係佢做中間人，到底件事係點呢？羅范接到查詢時大為緊張，堅稱冇做過梁淑貞同Ada嘅雞仔媒人，同記者講咗半粒鐘，收線之後再打電話畀記者，話即刻搵過Ada，Ada都親口證實，梁淑貞嘅介紹人，其實係教育署高級助理署長湯啟康，叫記者搵Ada求證。
羅范咁緊張，我哋都再搵Ada證實，Ada話細佬知啲唔知啲，聽到教署高官就誤以為係羅范啫，還羅范一個清白。