喺富貴黨分裂出嚟嘅林健鋒、梁劉柔芬同梁君彥被人叫做3L大半年，最近有風聲傳佢哋已埋班成功，喺今個月二十六號正式開檔迎賓，新組合取名「經濟動力」，仲搵嚟「新界王」劉皇發做顧問。不過，據我哋了解，發叔唔介意同3L行得埋啲，但就要保留自由身，費事他日順得哥情失嫂意。
據了解，3L租咗金鐘中港大廈二樓全層做新竇，然後搵人組班，搞咗大半年終於成事。而六月二十六號呢個日子，係特登搵人揭通勝揀番嚟，仲指明一定唔可以係破日、赤口，睇嚟經歷過富貴黨選舉重創、黨內紛爭、最後高調退黨嘅3L，依家對嗌交鬥嘴戒心特別重喎。我哋揭過通勝，二十六日宜開市，啱晒3L新竇開檔。
至於佢哋嘅新名就同坊間唔少號稱動力嘅組織好相似，譬如「西九新動力」、「民主動力」同「新力量網絡」咁，再嚟一個「經濟動力」，會唔會濫咗啲呢？