上個月二十一號，油尖旺區議會舉行食物環境事務委員會會議，討論豬流感相關議程，增選委員徐偉雄喺地區衞生嘅發言中，突然離題憤言：「我上星期喺四樓電腦房見到有議員上網時除咗鞋，對腳戙喺電腦枱，仲一面撩鼻屎……」佢話自己影咗相，而呢個舉止不雅嘅人做過油尖旺區議會主席。

會議正經議程被忽略

呢個時候，現任主席鍾港武唔知係咪驚自己成為嫌疑犯，開晒名話嗰個失儀人士係陳文佑，仲加多兩錢肉緊咁話，早前都見過陳文佑「一腳踩櫈，一腳戙上枱」，仲有相為證添。陳文佑聽到同事對佢嘅指控，即時大動肝火斥：「我都有好多大家嘅醜態，係咪要放上網吖？」結果會議被迫中止。

據講，當日會議議程幾乎被忽略，議員只顧互相指斥。問番陳文佑件事係點，佢以「對鞋濕咗，除出嚟晾乾」同「去完廁所用紙巾整理面容」解釋戙高腳、撩鼻屎嘅行為，並強調當時只有自己一人喺議員休息室，冇影響到人，仲話對方影相係「嚴重侵犯個人私隱」，認為對方嘅行為影響區議會形象。

不過，鍾港武卻認為：「佢（陳文佑）做呢件事已經影響區議會形象！咁大個人應該有衞生常識，我接受唔到囉！」鍾又透露，已有兩名議員向佢投訴陳文佑漠視公眾衞生，佢準備喺內會討論有關投訴，所以先要影相為證，以免到時口同鼻拗。佢哋各執一詞，選民真係冇眼睇！