嘩！世界變咯！唔通「身教」真係發揮作用？「不讀詩書形體陋」、「腹有詩書氣自華」，犬兒自小六開始，嘗問吾作文之道，乃告之曰：「讀書破萬卷，下筆如有神。家裏四牆八壁都是書，你可選些唐詩讀吓背吓，慢慢就會培養出想像力啦！」

「咁心急去書展，有好書推介乎？」「老竇果然讀書破萬卷，料事如有神！冇錯，今個書展，我已約了六、七個書友，準備去搶購(口靚)模寫真集，有所謂『夏之盛放』、『美味天使』，個個童顏巨胸，E Cup Baby，我哋至鍾意啦！」

我這個老爸唔知好笑定好嬲，與兒子亦父亦友，唯一的好處就係佢肯在你面前露形講真嘢！青春期少男，有些內裏騷動亦正常也！先前佢介紹我睇一本小說叫《天亮以後不分手》，笑住話：「老竇，你同阿媽都幾十年人世，呢本小說至啱你！我就唔同，有火紅青春的怒潮，所以我就啱睇呢本《天亮以後說分手》！」真係前世咯！我以為佢會讀唐詩三百首或繪圖版三國演義，點知佢人細鬼大！唉！如果佢係女仔，為父又多重擔心──怕佢跌入援交陷阱也！

現世紀做人父母真艱難，世界思潮在變，啲細路上網，到處都有水着三點巨胸女，碧波玩水，搔首弄姿，阿伯都睇到流鼻血，你話十四、五歲的青少年，有乜辦法唔谷到上腦呀！

吾友乃文藝青年，佢自資出版散文集，用三萬蚊圓了作家夢，佢話去年書展，有個碩乳女星的寫真集狂銷過萬冊，而佢本筆力直逼蘇東坡嘅散文集只賣了四本，其中兩本仲係阿媽買嘅，認真冇癮！佢笑說：係波展多於書展！