睇到咁嘅新聞，又係旺角，又係鏹水彈，咁熟口熟面？不過大家千祈唔好以為係新聞回顧，又或者警方喺度案件重演。叮！旺角鬧市真係又再一次畀鏹水彈襲擊呀！

叮佢個鎯鎯，呢次係半年內，旺角鬧市發生嘅第三單高空投擲腐蝕性液體事件！鏹水彈狂徒嘅暴行，真係令人髮指呀！

弊在劑劑案發後，警方冇錯係表現出好緊張、好重視，除咗交由警隊王牌重案組跟進，仲要啟動超級電腦協助查案，又搵晒成班專家出嚟裝模作樣重組案情。但咁又點吖？案件咪依然茫無頭緒，嗰個鏹水彈狂徒繼續逍遙法外笑緊警方傻仔。

睇住鏹水彈狂徒一而再、再而三犯案，小市民憤慨都冇用。三歲細路哥都知道，呢個兇徒隔一個月又重施故技，唔止為咗傷害無辜路人咁簡單，最主要係向警方發出挑釁：「吹咩！係我掟呀，你奈得我何呀？」

睇番近年嘅高空墮物舉報個案，唔講猶自可，一講心都寒。原來每年有過千宗，幾乎每日有三宗，小至煙頭、廁紙，大至磚頭、雪櫃，總之搬得起都有本事掟得落街，戴埋鋼盔、着住成套盔甲都頂唔住呀！

香港高空擲物嘅問題之所以咁嚴重，當然同市民公共道德質素下降有莫大關係。但最主要嘅原因，就係警方查案認真水皮。知唔知相關案件嘅破案率有幾高呀？得兩至三成左右㗎咋。既然警察叔叔又拉唔到人，變態狂徒當然心存僥倖，有乜法子唔繼續以身試法？

其實喺第一單鏹水彈襲擊之後，油尖旺區議會已經同意安裝天眼。咪就係官僚作風累事囉，裝個咁簡單嘅閉路電視都拖咁耐，喺西洋菜街附近的兩座大廈安裝嘅天眼，竟然要拖咗半年至啟用。如果一早裝咗，正所謂唔打得都嚇得吖嘛。

話時話，莫講話依家仲係「天冇眼」，就算呢次有天眼又點吖。今次嗰個狂徒精甩辮，擺到明玩挑戰，你有張良計，佢有過牆梯，你喺西洋菜街大廈裝天眼，佢喺奶路臣街掟鏹水彈，警方呢劑名副其實「輸足一條街」。

叮佢個鎯鎯，如果警方再唔加把勁、動吓腦筋快啲破案捉人，鏹水彈恐襲睇怕陸續有來。小市民出街固然心驚膽跳搵命博，如果一個唔好彩傷到外國遊客，嗰條搖搖欲墜嘅旅遊經濟支柱冧硬都得嘞！叮！