六四剛過，有民主阿婆之稱嘅前政務司司長陳方安生尋日出席一個活動時又再抽水搭嗲，首先大讚十五萬人參加燭光晚會充分展現香港嘅言論同集會自由，之後就話中帶刺咁明窒煲呔曾，話：「我哋唔可以因經濟淡化六四……作為特首，最重要係六四或者其他民主、自由、民生議題都要第一時間掌握同認同市民嘅觀點。」
陳老太講得咁激昂，但當晚維園有數以萬計市民手持燃點咗嘅洋燭，其中唔包括佢，因為佢根本冇去。
被問起七一遊行，陳老太保持四萬笑容咁話今年一定會參加，但當記者追問時提到「恤髮」二字，佢先係一呆，然後就黑晒面嬲爆爆咁話：「吓？我上一次已經解釋過點解啦！」講完即閃。