負責審議兩項政府發債決議案嘅立法會小組尋日再開會，有議員質疑短過一年期嘅美國國庫債券叫bills、一年至十年嘅叫notes、長達十年以上嘅先可以叫bonds，即使係外匯基金同按揭證券公司發行嘅借款產品，都係叫notes（票據）同debt（債務工具），依家政府計劃發行嘅借款產品，年期只有兩至十年，冇理由可以叫債券，擺明係誤導公眾兼當議員係白癡！
另有議員批評發債決議案嘅條文寫法唔清晰，令人憂慮政府將來一旦出現嚴重財赤，會濫用呢批借款嚟幫庫房填氹。
與會嘅財經事務及庫務局官員唔肯講點解堅持要用債券呢個名，但最終畀金管局嘅同事踢爆，原來政府係擔心一旦將擬設嘅債券基金（Bond Fund）正名做債務基金（Debt Fund），可能會令外國評級機構以為港府好唔掂，急須舉債救亡。
政府又話為免引起法律訴訟，最多只會喺決議案註釋交代發債嘅政策目標，唔會正式寫入條文入面。咁搞法，容乜易變翻版迷債！