翹埋雙手等退休

政界盛傳有一名極高級嘅特區政府官員早前上京訪問時勁插煲呔曾，向專責港澳事務嘅中央領導投訴，篤爆煲呔曾最近成日喺政府內部呻吟，話就算做好嘢，啲市民都唔會讚佢，做錯少少事就畀人鬧到拆天，連阿爺都鬧埋一份，所以不如乜嘢都唔做好過，完全違背佢當日競選時提出「做好呢份工」嘅承諾，任期未做夠一半就好似等緊退休咁。

事實上，煲呔曾政府近半年嘅表現，的確可以用「少做少錯，唔做唔錯」嚟形容，包括將政改、競爭法、公營廣播檢討、最低工資立法，以至醫療融資等重要政策，刻意押後到七一後再處理，對於鏹水彈同冧樹、冧鐵閘等突發事故，又淨係識得事後補鑊，市民最記得嘅，就係佢先後喺立法會答問大會爆出「狗噏」同「代表論」等失言鬧劇。就算冇呢位高官上京篤背脊，阿爺都有眼睇啦！

不過話時話，呢位政府極高層走到上北京篤老細，係咪另有企圖，想自己仕途更上一層樓呢？