立法會紡織界代表「蘇菲」梁劉柔芬同商界代表「IQ博士」黃宜弘，平時貴精不貴多，甚少喺立法會大會上提出質詢或者動議辯論，真係唔到緊急關頭都唔出手嗰隻。好似今個年度內，蘇菲都只係提過兩條書面質詢，IQ博士更加未亮過劍，而且兩個都未提過動議辯論。難怪有時會畀啲監察立法會議員嘅組織，批評佢哋兩個懶散唔做嘢啦！

可能番薯香沒法擋，一係唔出手，蘇菲同IQ博士竟然齊齊出手，仲鬧雙胞添！蘇菲提出嘅動議辯論叫做「抓緊機遇把大三通轉危為機」，IQ博士提出嘅就叫做「港台經貿關係」，兩項辯論嘅字眼雖然唔相同，但係方向如出一轍，本質都係講緊點樣搞好港台關係。咁都仲未算，最弊嘅係兩項辯論都抽中喺今個月二十四號嘅大會上提出。

其他議員可一稿兩用

咁就煩嘞！佢兩個爭住搶食番薯，其中一個肯定焦硬。事關蘇菲同IQ博士都提出相近議案，咁就要睇立法會主席點樣裁決，其中一個可能性，就係主席裁決唔畀較遲提出嘅辯論上台，又或者是旦一個改一改啲字眼，令到兩個辯論冇咁相近，等大家都有得食。

蘇菲同IQ博士爭成點都好，相信最開心嘅可能係其他議員，事關兩項辯論議題咁接近，班議員分分鐘寫定一篇講稿，到時一雞兩味就得啦，認真慳水慳力。