05/06/2009

播放本新聞相關短片

西港島線超支 港鐵擺明搵笨

真係唔明政府點使錢嘅,派粒糖幫補吓畀金融海嘯害到雞毛鴨血嘅市民就牙痛咁聲,拖得就拖;泵水畀港鐵起西港島線就鬼咁疏爽,任人哋獅子開大口,貼埋大床都冇所謂。

政府計劃再補貼港鐵興建西港島線,補貼金額由六十億倍增至一百二十七億。尋日有議員喺立法會批評政府對港鐵太軟弱,話加碼補貼等於畀港鐵「要脅同宰割」,亦有議員話當局好似畀人綁住手腳「捱打」。

不過,運輸及房屋局局長鄭汝樺死唔認衰,仲大條道理話西港島線「唔係普通投資」,補貼只係希望工程快啲展開,以避免爭拗,日後港鐵連本帶利還款,就係「最好補償」喎。聽佢咁講,呢個項目唔單止冇畀人搵笨,仲着數多多添。

諗落鄭局長講嘅都唔錯得晒,西港島線的而且確唔「普通」。嗱,淨係講造價已經變咗天文數字,兩年前估算係八十九億,呢次一飆就飆到一百五十四億,無喇喇多咗七成三;講到政府補貼,同樣咁搶眼,由六十億加到一百二十七億。加得咁離譜,你話普通人點諗得到吖?

仲有一樣唔普通㗎,政府搏命泵水,港鐵對西港島線工程嘅承擔反而縮咗水,由原來嘅二十九億減少到二十七億。正所謂,蝕本嘅嘢冇人做,殺頭嘅嘢爭住做,咁着數嘅項目,梗係多多益善啦。

叮!當局話造價升係因為成本上升同施工範圍改變,近年全球各地好多大型工程開工,好似舊年嘅北京奧運咁,亦拉高咗建築材料價格。西港島線造價升又關京奧事,已經夠搞笑啦。金融海嘯之後,市場需求大減,樣樣原材料都平番晒,依家港鐵仲要政府孭數,擺明搵笨,政府仲話唔係慷納稅人之慨,自己請客,搵市民找數?

鄭汝樺話希望工程快啲開工係為咗避免爭拗,更加係明益港鐵,明屈市民。西港島線一拖再拖,工程未開工已嚴重超支,完全係因為政府議而不決、決而不行所致,同市民無關。要納稅人為政府嘅無能同施政失誤埋單,為港鐵減輕負擔,簡直豈有此理!

最扯火就係,港鐵尋日開股東大會,有長者小股東要求佢哋延續將喺八月底到期嘅長者車費優惠措施,但港鐵淨係回應話,「研究」緊有關建議,連老人家一個禮拜得嗰一日、每程慳番兩蚊嘅小小優惠都唔肯應承。睇嚟,呢件事都係得個拖字,拖到不了了之。

叮!自從港鐵合併以嚟,佢哋唔單止一直冇減價,呢次起西港島線仲要政府畀巨額補貼,咁同要脅有乜分別?港鐵有着數自己攞晒,對市民一毛不拔,政府如果繼續縱容佢哋損害港人利益,直頭係與民為敵啦。

港鐵高層尋日話,出資方案已經平衡咗各方嘅利益。鄭局長咁鍾意幫港鐵做「代言人」,唔該解釋吓,港鐵大聲夾惡,政府予取予攜,你哋心裏面到底仲有冇市民嘅利益?叮!