香港有各種各樣嘅團體，友好協進會近來走勢愈嚟愈勁，有政界人士早喺全國政協常委陳永棋兩年前做主席時，已經預言友協會未來肯定唔簡單。最近有京官訪港，並閉門向親中人士發表報告，據講有資格出席嘅只有三類人士，除咗港區人大、政協之外，就係友協會嘅成員。
咁講法，即係友協會變相升咗格，同屬於建制系統嘅人大、政協平起平坐。呢個變化真係好大，事關友協會本來係民間團體，但陳永棋揸旗做主席後就開始「質變」，更有「港區政協隱形辦公室」嘅講法。
以前政協常委裏面嘅一班大孖沙，好似郭炳湘同鄭家純咁，鮮有加入友協會，不過依家就紛紛填表做晒會員，同以前李東海揸莊嘅年代不可同日而語。咁多大孖沙畀面友協會，梗係事出有因啦，聽聞一百五十幾名港區政協，早前全部收到中央駐港機構嘅一封信，呼籲大力支持友協會嘅工作，友協會個底有幾硬，大家心中有數。