富貴黨前主席田北俊近排喺總商會選舉中疑被針對，該黨早前嘅內訌主角、身兼總商會理事嘅李大壯尋日回應件事，一方面話唔覺得總商會同富貴黨嘅關係好僵，仲自爆佢都有喺改選中投票畀田少，另一方面佢又力撐總商會主席包立賢出信同富貴黨劃清界線，強調商會唔應該同個別政黨關係過分親密。
李大壯呢番表態真係好古怪，唔通想同田少再次過招？李大壯已經唔係富貴黨成員，問佢會唔會加入3L，佢澄清雖然佢嘅姓氏都係L字頭，但就唔係傳聞中嘅第四條L，叫大家唔好誤會。
佢仲話，有啲立法會議員對金管局總裁嘅立場好奇怪，一時話現任總裁任志剛要為雷曼事件引咎下台，另一方面又講到香港好似冇咗任總唔得咁，明顯係自相矛盾。
講番早前總商會嘅訪京行程，據講田少冇跟大隊一齊坐飛機，佢嘅前黨友、總商會立法會代表林健鋒唔認為田少咁做有特別意思，佢話除田少之外，仲有其他人冇跟機，事實上，佢哋後尾出席貿促會晚宴時，大家亦有講有笑啦。