未夠班做亞太教育樞紐

佢哋話，本港高考生獲分配嘅大學學位愈嚟愈少，平均每年只得百分之十八嘅學生可以做大學生，內地都有二成三啦；實際學額方面，九六年有一萬三千多個大學學額，舊年就少到只得一萬一千九百幾個。由於學生人數冇少過，搞到舊年嘅高考生入到大學者只有三成三，比起九六年四成半高考生入大學差天共地。

十幾年過去，本港非但冇高等教育普及化，反而愈嚟愈少學生可以做大學生，真係反智兼反世界潮流。因為咁，好多家庭被迫送仔女去外國讀書。好笑嘅係，香港呢頭搏命輸出學生，嗰頭啲政府高官又頭腦發脹，話要發展香港做亞太教育樞紐，前晚商務及經濟發展局副局長蘇錦樑喺立法會嘅辯論發言時，又大吹特吹本港三間本地大學榮登亞洲最佳大學榜五大嘅威水史，仲話政府做咗幾多嘢，唯獨唔敢講本港大學教育嘅普及率。

其實，今年經濟不景，高考生都唔想畢業即失業，入大學讀書係最理想嘅發展，可惜政府理都唔理，淨係識得整啲使錢唔討好嘅大學生實習計劃出嚟。難怪有口痕友話，世界上有邊個教育樞紐輸出嘅學生多過輸入學生㗎？好心鬍鬚曾佢哋唔好淨係識得發夢，快啲放水畀大學辦多啲大學學額出嚟啦！