其實唔係吖，香港都有唔少平價賓館㗎。呢嗱，近日喺上水區就出現多個賓館套房招租廣告，冇錯遠係遠啲，之但係夠晒平喎，每晚租金二百元。唔好以為得豆腐膶咁細，裏面有客廳又有睡房，二百幾平方呎，相當寬敞吓㗎。

講到設備呢，亦都唔太曳。二十七吋電視、梳化椅、雙人床，仲要有埋廚房添，應有盡有，隨時仲齊全過五星級酒店呀。咁抵玩，搞到太一叮都心郁郁，想周末去住番一、兩晚攤抖吓添。

咪住咪住，本報記者曾經明查暗訪入去見識過，唔知有乜Comment呢？

叮！呢間賓館巴閉咯，得一層樓咁高，結構甩皮甩骨，外圍求其用鋅鐵同埋夾板搭成。入到去一大陣油漆味，地拖以及裝修廢料一地都係。間房仲得人驚，梳化又殘又舊唔在講，連窗都冇隻，成陣霉臭味散都散唔去。

最攞命嘅係，賓館隔籬條行人路放咗好多包混凝土、木板、發泡膠盒之類嘅垃圾，惹埋好多蚊蟲及跳蝨。記者喺裏面企咗陣，雙腳已經被蚊蟲咬到腫晒。咁惡劣嘅環境，唔好話要住一晚吖，諗一秒已經毛管戙呀！

根據香港嘅法例，所有賓館都要符合屋宇署同埋消防處嘅相關規定，唔可以有違例建築物，要有充足嘅照明同埋通風設施。好明顯，三歲細路仔都知呢間賓館根本就唔合資格做持牌賓館啦。

最搞笑嘅係，當記者將資料轉畀地政總署以及民政事務總署跟進，兩個部門都答得九唔搭八。地政總署證實呢間賓館係寮屋，只係發現改變咗部分用途，要求寮屋佔用人拆咗僭建物就算，至於裏面做啲乜？係唔係非法賓館？就關人個關。

民政事務總署負責監管本港酒店同埋賓館，署長陳甘美華應該責無旁貸冇得再推卸責任㗎啦。點知該署發言人答得仲騎呢，佢話有派過人去寮屋睇過，但因為屋裏面冇人，入唔到去，所以冇發現有涉嫌非法經營賓館。

叮佢個鎯鎯，既然叫非法經營咯，梗係收收埋埋嚟做啦，唔通會牛龜咁大隻字喺門口寫明係「黑心賓館」咩？陳甘美華邊係唔知呀，其實咪又係懶。

有旅遊界立法會議員一句踢爆，話本港二、三星酒店數目唔夠，搞到無牌賓館問題非常嚴重，最弊就係政府長期隻眼開隻眼閉唔監管之嘛。既然陳甘美華闊佬懶理，不法商人見有利可圖，呢啲非法賓館仲唔成行成市咩？

據資料顯示，本港嘅持牌賓館有五百幾間，據業內人士估計，無牌賓館都有幾百間㗎。村屋、馬檻甚至係豬欄，全部都可以做賓館，用嚟安排內地旅行團入住。唔好話太一叮靠嚇呀，呢啲賓館打大風倒塌有之、電線短路燒着雜物引起大火又有之，賓館隨時變「殯儀館」！

叮佢個鎯鎯，旅遊業係香港嘅四大支柱之一，旅客嚟香港消費，住賓館竟然住到搵命博，點會收貨呀？再係咁搞落去，連呢條碩果僅存嘅柱都塌埋，陳甘美華，太一叮一定惟你是問呀！