本報早前獨家報道中環擦鞋李伯畀食環署職員驅趕嘅辛酸史，引嚟網上熱烈回響。立法會議員余若薇早前去信食物及衞生局局長周一嶽，要求食環署酌情發牌畀李伯，等佢可以繼續喺中環擺檔。
尋日特登搵番李伯，佢話好多謝有議員幫佢，但「最多謝都係《東方日報》，唔係你哋報咗出嚟都無咁多人知！」雖然網上得到的回響唔少，但佢話知道有人幫已經覺得好開心。
其實，自食環署將李伯嘅搵食工具沒收後，喺美利大廈停車場泊車嘅一眾司機大佬就買番個工具箱畀佢，等佢可以繼續開檔。另外有網友提議李伯去佢佐敦嘅舖頭外擦鞋，有乜嘢事就會照應佢。李伯感激之餘又推咗，因為佢唔捨得中環啲熟客！喺中環擦鞋擦咗十幾年，佢儲落唔少熟客，仲透露間唔中都有達官貴人嚟幫襯。究竟係邊啲達官貴人？有職業道德嘅李伯點都唔肯講。