佢笑言做咗全方位格價專家快將一年，每個禮拜例必四出各區超市、雜貨店格價，日子有功頭腦都精明咗，但講到自己買嘢，佢鍾意睇啱就買，唔會左格右格。吓！格價一姐竟然唔格價，咁咪買貴咗都唔知？隨時老貓燒鬚喎！

接獲投訴多幾千宗

咁都冇辦法㗎，事關冇時間喎。佢話格價好花時間，又要親自出馬，唔可以假手於人，所以私底下嘅佢絕非「密底算盤」。老實講，格價一姐背後有成隊格價隊日格夜格，跟住就出份清單出嚟，格價一姐睇住份清單就一清二楚啦！咪好似《巾幗梟雄》入面嘅四奶奶咁，就算唔出門都知道成個無錫嘅米價係點！冇嘢可以呃到佢嘅，使乜四奶奶親自出馬啫！

佢仲話消委會收到嘅投訴多咗至少幾千宗，估計係因為經濟不景，多咗失業人士以偷呃拐騙方式搵快錢都未定，佢亦讚賞港人醒咗，畀人搵笨後唔會啞忍，所以消委會近年收到嘅投訴夠晒古靈精怪。