由地鐵年代做到依家港鐵行政總裁嘅周松崗，大大話話做咗五年幾，雖然任期唔算好長，但見證咗幾條新鐵路落成，最成功就梗係搞掂兩鐵合併。
周總今年五十九，好多呢個年紀嘅前輩已經退咗休享受人生，但港鐵公司董事局未肯放佢走，仲好似慌死佢唔做落去，尋日先啱啱六月一號，已經提早半年宣布定再委任佢做行政總裁，任期由今年十二月一號去到二○一一年十二月三十一號，即係再做多兩年。
一班傳媒尋日一心諗住趁香港總商會訪京團北上，問吓周松崗續任嘅心情，點知佢原來冇隨團出發，唔知係佢太忙，定係想暫時遠離「總商會事變」嘅是非呢？