最近翻查議員開支申報記錄，當中工程界代表何鍾泰由舊年十月到今年二月，已申領咗萬九蚊醫療津貼，睇番啲單據，原來佢一個月都會去浸大中醫專科診所接受兩至三次針灸，每次醫藥費大概六百至七百元，難怪份津貼咁快就使得七七八八啦！

一日瞓得三四粒鐘

其實都係立法會工作太繁重啫，研究雷曼事宜小組委員會單係預備會已開咗八十幾次，身為委員會主席嘅佢都忍唔住呻辛苦，話依家忙到一日瞓得三、四粒鐘，抽唔到時間做運動，咪惟有靠中醫調理吓身子囉！佢話血氣流通對身體好緊要，所以冇乜病痛都去針灸，打通全身經脈，行氣活血。

佢話買完份萬五蚊嘅住院保險後，剩低一萬蚊左右，但投保至今都「用唔着」，所以諗住一到期就cut咗張保單「止蝕」喎！