批評「二波論」危言聳聽

雖然早前任總已宣布九月退休，臨別秋波仲為自己過往衝撞過議員嘅言論，向班議員耍冧，博班議員喺立法會雷曼迷債小組委員會對佢輕手啲，但係金融服務界議員「金勞詹」詹培忠同白鴿黨甘乃威好似嗜血嘅鯊魚咁繼續咬住唔放，唔肯放佢一馬。

金勞詹同任總多年嚟嘅恩恩怨怨，真係幾本書都寫唔晒。當年任總淨係識用挾高息一招嚟對抗亞洲金融風暴，畀金勞詹改咗個花名叫「任一招」。今年初，任總喺立法會警告金融海嘯第二波同第三波即將殺到，金勞詹死都唔信，質疑佢咁講喺為咗爭取延長自己嘅任期，再同佢改多個花名叫「任二波」，認真抵死。

呢排金魚缸水位係咁升，尋日股市再次大升七百幾點，比年初低位升咗接近三分之二，金勞詹就牙斬斬咁話，一早講咗任總嘅「二波論」係危言聳聽，好彩佢不嬲都醒過人冇聽佢講，否則就會錯過今次升浪，賺少好多。佢又批評任總至今都唔肯就雷曼事件認錯，由頭到尾都只想推卸責任，就算退咗休都唔可以輕易放過佢。

借雷曼事件成功上位嘅甘乃威，亦話任總喺保障小投資者同監管銀行銷售手法方面失職，同佢過千萬嘅年薪完全唔相稱，一定要追究到底，尤其係繼雷曼迷債爆煲後，最近又有一隻名為精明債券嘅結構性投資產品出事，愈揭愈多人受害，任總冇理由可以全身而退、光榮退休。

都話手尾長啦！睇怕任總喺九月退咗休，都未必甩到身呀！